Joh 21 | NAS | STEP | Jiisuuꞌ napoꞌ taaꞌniꞌpoi siraꞌantavaruꞌnaꞌ niiꞌ bakaning barevare-nupoong Kaaleliꞌnaruꞌkoo oꞌnoriko teeꞌ eeꞌ nkoaruꞌ:

John 21

Jiisuuꞌ ~Kenaanka-taa-anko Bakaning Barevare-nupoong-anko Tavoꞌaruꞌnaꞌ

1 Jiisuuꞌ napoꞌ taaꞌniꞌpoi siraꞌantavaruꞌnaꞌ niiꞌ bakaning barevare-nupoong Kaaleliꞌnaruꞌkoo oꞌnoriko teeꞌ eeꞌ nkoaruꞌ: 2 Saimoniꞌ Piita, Toomasi (Pauroong tampampikoꞌnung), Natanieloꞌ (Kana-namono-nung, Kaaleliꞌnameng-koonooꞌ), neeꞌ Siebedi-baurinketa, eeꞌnoko niiꞌnaanka kenaankara bakaning barevare-nupoong-koonaanka niiꞌ nariꞌ oꞌnoriko. 3 Saimoniꞌ Piitai niiꞌning aaꞌmuruꞌ, “Ning kapaꞌkoo nanang.” Niiꞌke aaꞌpampiruꞌ, “Eeꞌ, tee aaꞌ niiꞌ moriiꞌnaang.” Teketa bakaasi-koo aaꞌemarira teꞌmung eeꞌnaꞌmung ootukunaꞌmung muunganang kapaꞌkampima nau asiꞌnu barankampiaꞌ.

4 Duaaꞌ mmeꞌ tavoꞌarako Jiisuuꞌ donkonuuꞌ teruꞌkoo tapiru. Eeꞌnoko niiꞌke bakaning barevare-nupoonge ooampiaꞌ tee Jiisuuꞌpinaꞌ. 5 Eeꞌnoko teie aaꞌmuruꞌ, “Ee aing nemaaꞌ, diiꞌ ee barankiriaruing?”

Niiꞌke aaꞌpampiruꞌ, “Eeꞌ, barankampiaꞌ.”

6 Eeꞌnoko Jiisuuꞌke aaꞌmuruꞌ, “Napoꞌ sionung duaꞌeriaing bakaasi-koo tampanaang-aapei niiꞌning barankiriainaꞌ.” Eeꞌnoko teeꞌpuioꞌ niiꞌke sionung napoꞌ duaꞌampiruꞌ ntong-koo, eeꞌnoko duaꞌampira mmauꞌ kapaꞌnaraꞌ dauꞌpampira intampampiaruuꞌ. 7 Eeꞌnoko ning Jiisuuꞌ baꞌmaikoꞌke Piita aaꞌpantuꞌ, “Tee aung Ovoring.” Eeꞌnoko Saimoniꞌ Piita tee Ovoring taaravura bakaang mononopaꞌke ioꞌ kiruꞌaruꞌnunge nopaꞌarara dinkitooꞌaruꞌ ntong-koo. 8 Eeꞌnoko niiꞌ niiꞌning bakaning barevare-nupoong piisiꞌkoo duumumpiruꞌ sionung kapaꞌnaraꞌke maantoꞌuioꞌ taariꞌmarira barampampiri; teꞌ taviꞌ dauꞌpampiruꞌnooꞌ baruꞌ isipoꞌ kansiꞌketa deeaꞌnooꞌ, paꞌnokoꞌ kivora daangaꞌpinaꞌ.

9 Teketa piisiꞌkoo simariraiꞌnange ooampiruꞌ, taviꞌ eeꞌnoko bereteꞌ ntaꞌkoo dau otoko. 10 Jiisuuꞌke niiꞌ aaꞌmuruꞌ, “Niiꞌning taviꞌkoo tavoꞌeriaing teing-koo barampererining-koo.” 11 Teketa Saimoniꞌ Piita enang bakaasi-koo aaꞌearuꞌ, eeꞌnoko sionung barampuuꞌ piisiꞌaape taviꞌ pankainankai maantoꞌuioꞌ. Teing taviꞌning narung daakuꞌketa paꞌnokoꞌ kivora-ita beenaumo [153]. Nka bane taviꞌ mmauꞌ, nka sionung dereꞌaravaꞌ. 12 Jiisuuꞌke niiꞌ aaꞌmuruꞌ, “Porira mamompiai.” Eeꞌnoko niiꞌ maiaꞌmoruꞌ eeꞌ niaꞌkoo “Daꞌ baa?” noruꞌampiritaaꞌ tee tee Ovoring. 13 Teka Jiisuuꞌ poraiꞌnange bereteꞌ nkavura amuruꞌ, taviꞌke teeꞌ siong-antavui.

14 Teꞌmung eeꞌnaꞌmung beenanaꞌ taaꞌniꞌpoi siraꞌantavaruꞌnaꞌmung Jiisuuꞌ baka niiꞌkoo bakaning barevare-nupoong-koo booꞌketa daaꞌararaiꞌnange.

Jiisuuꞌke Piita Tautauvuuꞌnaꞌ

15 Aung aaꞌ tee, taamang bakemariraiꞌnange Jiisuuꞌke Saimoniꞌ Piita aaꞌpuuꞌ, “Saimoniꞌ, Jooni bauring, dake ee ning piaamemang aing-koo dau basinooꞌ?” Teie makuꞌuma aaꞌpuuꞌ, “Eeꞌ. Dake noruꞌmei otong, ninge piaaramang.” Eeꞌnoko Jiisuuꞌke aaꞌpuuꞌ, “Nkaning sipisipiꞌkoong sieꞌnanka tanataveriaing.”

16 Eeꞌnoko napoꞌ kemuꞌkanaꞌ Jiisuuꞌke aaꞌpuuꞌ, “Saimoniꞌ, Jooni bauring, dake ee ning piaamemang?” Teie makuꞌuma aaꞌpuuꞌ, “Eeꞌ, Ovoring, dake noruꞌei otong ninge daꞌ piaaramang.” Jiisuuꞌke aaꞌpuuꞌ, “Nkaning sipisipiꞌnanka tareveriaing.” 17 Aung aaꞌ beemuꞌpinaꞌ Jiisuuꞌke aaꞌpuuꞌ, “Saimoniꞌ, Jooni bauring, dake ee ning piaamemang?” Piita orakaꞌ deeꞌouꞌ Jiisuuꞌke beemuꞌpie nianiaꞌ niaꞌuioꞌ, aaꞌpuma, “Dake ee ning piaamemang?” Eeꞌnoko Jiisuuꞌ aaꞌpuuꞌ, “Ovoring, daꞌ ookara kapooꞌ noruꞌei otong. Dake ning noruꞌmei oꞌnong daꞌ ninge piaaransi oꞌnong.” Jiisuuꞌke aaꞌpuuꞌ, “Nkaning sipisipiꞌnanka tanataveriaing. 18 Masikaꞌ nauramaang, daꞌ nemaaꞌdaritaaꞌnange tokoniiꞌ pinkaꞌdarama avitoitoi nanikoꞌ piarokoꞌnaꞌ, eeꞌnoko pankaꞌdarara dakaang bireng tovoroꞌdaravaing, eeꞌnoko niiꞌnunge bireng pinkaꞌdura tokoo nkaruaing piaroaukaꞌnooꞌ.” 19 Teeꞌ aaꞌbarataꞌkoo Piita booainaꞌ Jiisuuꞌke minkuvuma nauvuuꞌ, Kumponing-anko meenasi tavoꞌuma. Eeꞌnoko Jiisuuꞌke aaꞌpuuꞌ, “Ning siomeaing.”

Jiisuuꞌke Jooni Tautauvuuꞌnaꞌ

20 Piita damaꞌdu-aape toroarama ning Jiisuuꞌ baꞌmaikoꞌ oomuuꞌ, ning eeꞌnara taamang naiampima Jiisuuꞌkoo darimaritaaꞌ niaꞌama aaꞌpantuꞌnung, “Daꞌ baie kare-nupoong-koo sing-antaruuꞌnaang?” 21 Eeꞌnoko Piitai ning oomuraiꞌnange Jiisuuꞌ aaꞌpuuꞌ, “Ovoring, arekeeꞌ tee aung naning?” 22 Jiisuuꞌke makuꞌuma aaꞌpuuꞌ, “Tee domampari otoaing bera ning napoꞌ moainooꞌ miruꞌampaing deekoꞌ tee dakaang kapooꞌ deeaꞌ. Ning siomeaing dake.” 23 Teeꞌ minkuvuioꞌ minkunaa beremparuꞌ Jiisuuꞌ bakaning barevare-nupoong-koo ning moompaukaꞌnung. Nka Jiisuuꞌke minkuvuaꞌ ning moompaukaꞌnung. Teeo aaꞌpuuꞌ, “Tee domampari otoaing bera ning moainooꞌ miruꞌampaing deekoꞌ tee dakaang kapooꞌ deeaꞌ.”

24 Ning tee eeꞌnara bakaning barevare-nupoong-koonge aing kapooꞌ minkuansing eeꞌnoko daariansi. Eeꞌnoko niiꞌke noruꞌampiri otong tee kapooꞌ ninge minkuansing tee masikung.

Botunanaare

25 Eeꞌnoko tee niiꞌning oovuning kapooꞌ mmauꞌ Jiisuuꞌke nkovuuꞌ aꞌ otoaing. Ookara narunaꞌ narunaꞌ daari-koo ookara kansiꞌ makotuarupeuꞌ pa teing buuku kong-koo tee daariaapeuꞌning.